Bolalar tug‘ma yurak nuqsoni kasalliklari: tashxis, profilaktika, davolash usullari

JSST ma’lumotlariga ko‘ra, har yili har yuz ming chaqaloqdan 6-10 nafari tug‘ma yurak nuqsoni bilan dunyoga keladi.

Bu xastalikning oldini olish, erta aniqlash va bemor bolalarni darddan forig‘ etish haqidagi O‘zbekiston Respublikasi Sog‘liqni saqlash vazirligi Jamoatchilik bilan aloqalar bo‘limi tomonidan yo‘llangan savollarga Sog‘liqni saqlash vazirligining bolalar kardioxirurgiyasi bo‘yicha bosh mutaxassisi, tibbiyot fanlari doktori, professor Hakimjon ABROLOV javob beradi.

– Bolalar tug‘ma yurak nuqsoni bilan dunyoga kelishining asosiy sabablari nimada? 

— Tug‘ma yurak nuqsonlari yoki umuman tug‘ma anomaliyalarning rivojlanishiga, asosan, oltita faktor ta’sir qiladi. Ular quyidagilardan iborat:

-homilador ayollardagi anemiya;

-ayolning surunkali yoki o‘tkir infeksiyali kasalligi;

-virusli kasalliklar;

-garmonal faktor;

-neyrogumoral faktor;

-yaqin qarindoshlar o‘rtasidagi nikoh.

Kamqonlik, homiladorlikning dastlabki uch oyligida ayolning grippga chalinishi va bunga qarshi davolanmasligi, qolaversa, buyrak va boshqa a’zolardagi surunkali xastaliklar, onada uchraydigan turli infeksiyalar va virusli kasalliklar homilaning sog‘lom rivojlanishiga imkon bermaydi. Natijada, bolada tug‘ma nuqsonlar paydo bo‘lishi mumkin.

Bu muammoning oldini olish uchun homiladorlikni rejalashtirishdan oldin bo‘lajak ota-ona tor mutaxassislar ko‘rigidan o‘tib, kasallik aniqlansa, davolanishi lozim. Buning uchun oilada tibbiy madaniyat yuqori bo‘lishi kerak.

– Bolalarda tug‘ma yurak nuqsonlarini erta aniqlashning eng samarali usuli haqida ma’lumot bersangiz.

– Buning eng samarali yo‘li homilador ayollarni skrining ko‘rigiga o‘z vaqtida jalb etishdir. bugungi kunda mamlakatimizda ona-bola skrining xizmati rivojlanib borayapti. Qolaversa, tug‘ruq majmualarida har bir chaqaloq chuqur ko‘rikdan o‘tkaziladi. Bolada tug‘ma nuqson bo‘lsa, shu yerning o‘zida aniqlash imkoni mavjud.

Keyinchalik bola toki sog‘aygunicha tegishli mutaxassislarning doimiy kuzatuviga, shuningdek, ixtisoslashgan bo‘limlarga yotqizilib, chuqur invaziv tekshirishlar o‘tkaziladi.

Bundan maqsad — boladagi tug‘ma yurak nuqsonlarining turini, asorat darajasi va eng muhimi, optimal davolash taktikasini belgilab olishdir.

– Tug‘ma yurak nuqsonlarini bola necha yoshga to‘lganicha davolash talab etiladi?

– Tug‘ma yurak nuqsonlarining turlari juda ko‘p. Shu bois, davolash ishlari kasallikning turiga qarab belgilanadi. Deylik, ochiq arterial protok – shunday turlardan biri. Bola olti oylik bo‘lgunicha, organizmdagi fiziologik o‘zgarishlar tufayli bu tug‘ma yurak nuqson turi kichik hajmda bo‘lsa o‘z-o‘zidan yopilib ketish imkoni bo‘ladi.

Qisqasi, har bir kasallikni davolashning o‘z standartlari bor. Davolash ishlarini shu asosda tashkil etish uchun bemor doimo shifokor kuzatuvida bo‘lishi lozim.

Shuni unutmaslik kerakki, tug‘ma yurak nuqsoni bilan xastalangan bolani parvarishlashda to‘g‘ri ovqatlantirish, o‘z vaqtida uxlatish barobarida, oilada tozalik va gigiyena qoidalariga ham to‘la rioya etilishi kerak. Aks holda, bolada surunkali infeksiyali jarayonlar yuzaga kelishi boshqa kasalliklarni ham keltirib chiqarishi, bemorning ahvolini yanada og‘irlashtirishi mumkin.

Yana bir muxim xolat tug‘ma yurak nuqsoni va markaziy nerv sistemasi, oshqozon-ichak tizimi va boshqa a’zo- sistemalarning anomaliyasi birgalikda kelishi holatlarida davolash taktikasini belgilash juda ham qiyin hisoblanadi, bunday holatlarda bola hayoti uchun xavf tug‘dirayotgan jarayon birinchi bo‘lib davolanishi kerak.

– Bolaning lablari, yuzi, barmoqlari tez-tez ko‘karishi yurak xastaligining belgisimi?

– Bu ko‘karish (sianoz) bilan kuzatiladigan tug‘ma yurak nuqsonlarining bir belgisi hisoblanadi. Bundan tashqari, tez-tez shamollab, tuzalishi cho‘zilayotgan yoki pnevmoniyaga chalinadigan bemor bolalarni ham kardiolog chuqur tekshirishi kerak. Ota-ona bunga e’tiborsizlik qilib, bolaga o‘z bilganicha dori ichirishi mumkin emas. Bunday holatlarning oldini olish uchun bolalar tarbiyasi va sog‘lig‘iga e’tiborli bo‘lish, tez-tez shamollaydigan, injiq, nimjon bolalarni alohida kuzatuvga olishi maqsadga muvofiq. Shunda tug‘ma yurak nuqsonli bemor bolalarni o‘z vaqtida aniqlab sog‘lomlashtirishga erishish mumkin.

Ulashing | Поделись этим: