YOLG‘ONDAKAM KASAL - Dono.uz

YOLG‘ONDAKAM KASAL

Qachonlardir bir o‘rmonda ulkan sher yashagan ekan. U ancha qarib, tishlari-yu, tirnoqlari tushib ketibdi. O‘ljasi ham shundoq burni tagidan qochib qoladigan bo‘libdi. Shunda u o‘ylab-o‘ylab chorasini topibdi. “Bir qari sher og‘ir kasal bo‘lib qolibdi”, – deb o‘rmonga gap tarqatibdi.

O‘zi bo‘lsa bir tog‘ orasidagi g‘orga yashirinib olibdi. Hamma yoqdan kasal ko‘rgani hayvonlar kela boshlashibdi. Sherning kasalidan xabar topgan qari tulki ham ko‘rgani kelibdi.

Tulki g‘or og‘zida to‘xtab:

– Xo‘sh, sher og‘ayni, sog‘liqlaring qalay? – debdi. Shunda sher:

–Tulkijon, singlim, nega tashqarida turibsan? Boshqalar yonimga kelib, sog‘lig‘imni so‘rashyapti. Sen ham kir yonimga! – debdi.

Tulki unga javob beribdi:

–Sher og‘ayni, sen bilan do‘st bo‘lish yaxshi. Ammo, oldingga kirganlarning oyoq izini ko‘ryapman-u, u yerdan chiqqanlarning oyoq izini ko‘rmayapman. Shuning uchun, do‘stlikning eng yaxshi  usuli – uzoqdan hol-ahvol so‘rash.

 

Shunday qilib tulki sherdan qutulib ketibdi.

Javob berish

E-pochta manzilingiz chop etilmaydi.

Free WordPress Themes